Эв нэгдлийг илэрхийлэгч үү, эвдэгч үү?

Хэдхэн хоногийн өмнө сайд болох хүмүүсийн нэрсийг өөртөө таалаг­даагүйн төлөө чагталсан Ерөнхийлөгч дахиад нэг горилогчоос татгалзаж, Ардын намын дөрвөн сайдын нэрийг буцаав. Хар дансанд нэмэгдсэн нөхөр бол эрх баригч намын Ерөнхий нарийн бичгийн дарга буюу Тэргүүн Шадар сайдад нэр дэвшигч У.Хүрэлсүх байлаа.

 

-Ерөнхийлөгчийн үгнээс болж Хонгорынхон “зодолдож” эхлэв-

 

Гэхдээ Үндсэн хуульд Засгийн газрын тэргүүн танхимаа бүр­дүүлэхдээ Ерөнхийлөгч­тэй зөвшилцөхөөс бус зөвшөөрөл авна гэсэн утга үгүй тул С.Батболд ч өөрийн тоглолтоо өрнүүлж эхэллээ. МАН-ын даргад Ерөнхийлөгчийн буултаас хаах Үндсэн хууль гэдэг том бамбай бий. Тэр “Таны үгийг дагах албагүй шүү дээ. Хуульд ийм заалт бий” хэмээн  Ц.Элбэгдор­жийн саналыг үл хэрэгс­сэн, УИХ-ын даргад сайд нарын нэрсээ өргөн барьж буй хэрэг.

Сүүлийн үед унтаж байгаад гэнэт сэрсэн юм шиг Ерөнхийлөгчийн хэлсэн үг болгон шуугиан дэгдээдэг болж. Түүний хошуу дүрэхгүй сэдэв ч гэж алга. Чиг үүрэгт нь багтсан, үгүй нь хамаагүй бүхнийг мэдэгч, бүгдийг таалалдаа нийцүүлэгч байхыг хамгаас их хүсэх болов.

Засгийн газрыг ши­нээр эмхлэх тухайд хүртэл заавал өөртөө таалагдсан байх гэдэг ганц шалгуур тавьж, Ерөнхийлөгч юм уу, Ерөнхий сайд юм уу гэж андуурмаар болтол дураараа дургиж байна. Бүр сүүлдээ, Засгийн газраа эмхлэх гэсэн С.Батболдод хамгийн том саад нь сөрөг хүчин болж буйгаа зарласан Ардчилсан нам биш, тэр намаас түдгэлзэж Төрийн тэргүүн болсон Ц.Элбэгдорж болоод байна. С.Батболдыг “Уулзъя” гэж өрөөндөө дуудаад л гүйцээ. Ерөнхий сайд С.Батболд хоёулхнаа хөөрөлдөх юм байна гэж яваад очиход Ерөнхийлөгч бөөн камер дуудчихсан, шоудахдаа бэлтгээд сууж байна. Ардчилсан намын­хан Засгийн газраас гарч, нуруугаа харуулснаас хойш иймэрхүү дүр зураг олон давтагдав.

Өчигдөр өглөө ч Ерөн­хийлөгч Ерөнхий сайдыг урьжээ. Харин өмнөх өдөр нь “Ерөнхийлөгчийн хурууны аясаар хөдөлж байна” хэмээн гишүүддээ зэмлүүлсэн МАН-ын дарга очоогүй аж. Ингээд энэ өдөр Ц.Элбэгдоржийн шоудах төлөвлөгөө нурсан байна. Ханилсандаа хаягдсан Засгийн газрыг эмхлэх гэж зүдэрч байгаа МАН-ын даргыг тэр иймэрхүү байдлаар  ёстой л хүүхэлдэй шиг хөдөлгөх гэж оролдож эхлэв. Энэ бүхнийг тооцоод үзэхээр засаг байгуулагдаж, тө­рийн ажил цэгцрэхэд гол тушаа  нь сөрөг намынхан бус Ц.Элбэгдорж болж байгаа бололтой.

Яагаад гэвэл Засгийн газар бүтэн болохгүй байх нь түүнд л ашигтай. Засгийн газрын ажлыг хэдий хэр удаан гацаана, тэр хэрээр Ерөнхийлөгч тодорч харагдана гэсэн үг. Түүнээс биш С.Батболд сайд нараа томилоод тө­рийн ажил хэвийн үр­гэлж­лээд эхэлбэл, Төрийн тэргүүн гэдэг хүн жинхэнэ утгаараа бэлгэдэл болчих гээд байгаа юм. Ц.Эл­бэгдоржийг хэн ч тоохгүй өдрүүд үргэлжилж, ядаж л намын дарга нь Засгийн газраас гарахдаа хүртэл дуулгахгүй шүү дээ.

Гэтэл бүрэн эрхийн хугацаа нь дуусахад ганц жил үлдчихээд байдаг. Ард түмнээс дахин дөрвөн жилийн мандат авахын тулд тэр одооноос л ил гарах хэрэгтэй. Бэлгэд­лийн чанартай, байгаа байхгүй нь мэдэгддэггүй Ерөнхийлөгч гэж хэлүүлэх нь түүнд мэдээж ашиггүй. Ингэж л бухимдаад, хүн бүхэн рүү үсчээд байгаа хэрэг. Гэтэл энэ мэт шоу­дах үйлдлээрээ тэр Ерөн­хийлөгч хүн үндэсний эв нэгдлийг илэрхийлэгч гэдгээ мартчихаж.

Харин ч шоучин Ерөнхийлөгчийн хэлсэн үг болгон бөөн бужигнаан үүсгэлээ. Сайд нарт нэр дэвшигчдийг дуудаж уулзахдаа “Бараг долоо хоног бүр  2-3 хүн Хонгор суманд хордлого, хавдраар  өвчилж, нас барж байна” гээд хэлчихсэн. Гэтэл дараа нь үхэж биш, өвдөж гэж хэлсэн хэмээн Тамгын газрын дарга нь царайгаа барайлган үгийн алдааг нь залруулаад сууж байх жишээтэй. Мэдээж Төрийн тэргүүн хүн хааяа нэг зангарагтай үг хэлж, төрийн ажлыг нэг шугамд авч явах учиртай. Гэхдээ одоогийнх шиг ху­вийн тоглолтоо анхаараад, хүн загнахдаа хүртэл хариуцлагагүй үг хэлээд сууж байж таарах уу. “Долоо хоног бүр 2-3 хүн хавдраар өвчилж, нас барж байна” гэж хэлсэн Ерөнхийлөгчийн үгний дараа үнэхээр л Хонгорынхон бужигнаад эхэлсэн. Зарим нь нутгийн удирдлагаа шүүхэд өгч, нутгийнхан нь сахилгагүй нөхдийг шүүхэд өгнө гэж мэтгэлцээд ойрын хоёр, гурван жил нам гүм байсан Хонгорынхон хоорондоо зодолдоод эхэллээ. Эв нэгдлийг илэрхийлэгчийн хэлсэн үг эв нэгдлийг эвдлэгчийнх болон хувирчээ.

Ингэхэд Хонгорын асуудал яагаад сонгууль болохоор анхаарлын төвд орчихоод, сонгуулийн дараа дарагдчихдаг юм бол. Улс төрчдийн сайн хүн болж харагдах гэсэн жүж­гийн гол тайз нь Хонгор болдог энэ байдал хэзээ дуусах вэ. Лав энэ сонгуулиар үргэлжлэх нь.

Иймэрхүү байдлаар Ц.Элбэгдоржийн бэлгэдэл байхаас залхсан ам­бий­цаас болж хэдий болтол улс гэр үймж, дотроо хага­ралдаж, дороо бужигнан, засаг төр нь хүртэл гацаанд байх вэ. Монгол Улсын Ерөн­хийлөгч бол үндэсний эв нэгдлийг илэрхийлэгч болохоос эвдлэгч биш шүү.

Б.НЯМСҮРЭН

"Зууны мэдээ" сонин